Во најновото издание на надворешно-политичката емисија Глобал, уредникот Младен Џино се осврнува на неколку клучни настани кои ја потресуваат светската сцена.
Главна тема е израелскиот напад врз наводните нуклеарни постројки на Иран – потег кој може да доведе до нова фаза на ескалација на Блискиот Исток. Се отвора прашањето: има ли простор за дипломатија или светот е на чекор до поширок конфликт?
Покрај тоа, емисијата донесува сведоштва за тешката состојба во Појасот Газа, каде по повеќе од 18 месеци војна, хуманитарната катастрофа станува секојдневие. Активисти од пропалестински организации се обидуваат да допрат до светската јавност со апел за помош.
Глобал го анализира и новиот бран репресија против нерегуларни мигранти во САД. Доналд Трамп најавува жестока акција против илегалната миграција, додека протестите во неколку американски градови добиваат на интензитет, дел од нив проследени со насилство. Се поставува прашањето: што ќе биде со стотици илјади луѓе без документи кои живеат во правна и социјална несигурност?
Емисијата носи обемен преглед на глобалните тензии и политички потреси кои ќе ја одредат иднината на многу народи.
