На комеморацијата по повод 30-годишнината од геноцидот во Сребреница, Селма Ризвановиќ Мандал, претставничка на Координативното тело за одбележување на оваа трагедија, упати силна порака за сеќавање, одговорност и вистина.
„Поминаа три децении откако Сребреница, која требаше да биде град на заштита, стана симбол на најголемата болка, но и најголема дамка во историјата на модерна Европа“, рече Ризвановиќ Мандал во својот говор.
Таа нагласи дека геноцидот во Сребреница не бил спонтан чин, туку систематско и планирано уништување на условите за живот на едно население, конкретно на бошњачкото: „Тоа значеше опсада, масовно гладување, силување и убивање.“
Комеморациите се одржуваат во момент на сè погласни ревизионистички обиди за негирање на злосторствата и поткопување на вистината. Споменот на жртвите останува клучен столб во борбата против заборавот и неказнивоста.
