Британскиот премиер Кир Стармер изјави дека Лондон е подготвен да ја признае државата Палестина во септември доколку Израел не преземе чекори за ставање крај на огнот во Појасот Газа, се вели во соопштението по состанокот на британската влада.
Британија го гледа признавањето на Палестина како дел од напорите за зачувување на решението за две држави, рече Стармер.
„Решени сме да ја браниме одржливоста на решението со две држави, поради што ќе ја признаеме државата Палестина во септември пред Генералното собрание на ОН“, нагласи Лондон.
Велика Британија очекува Израел да преземе „значајни чекори за да се стави крај на ужасната ситуација во Газа“ и да се посвети на постигнување долгорочен одржлив мир.
„Пред седницата на Генералното собрание на ОН, ќе процениме до кој степен страните ги имплементирале овие чекори“, додаде владата.
Стармер посебно ја истакна тешката хуманитарна ситуација во Газа и го повика Израел да обезбеди пристап до хуманитарна помош и да престане со гранатирање на цивилите.
Минатата недела, Франција стана првата земја од Г7 и првата постојана членка на Советот за безбедност на ОН што формално ја објави својата намера да ја признае Палестина во септември, потег што беше поздравен од Палестинската самоуправа и остро критикуван од Израел.
Премиерот Бенјамин Нетанјаху ја нарече париската иницијатива „награда за терор“.
Американскиот државен секретар Марко Рубио, исто така, се изјасни против планот за признавање, остро критикувајќи го францускиот претседател Емануел Макрон.
