Од друга страна, премиерот Андреј Пленковиќ се залагаше за решение со две држави, нагласувајќи ја потребата од итно прекин на огнот, ослободување на заложниците, заштита на цивилите и испорака на хуманитарна помош.
Милановиќ ги даде овие забелешки за време на средбата со палестинскиот министер за надворешни работи и емиграција, Варсен Агабекијан, кој е во Загреб. Во таа прилика, тој нагласи дека „окупацијата на Газа не може да се оправда со ништо“ и рече дека единственото праведно решение е признавање на постоењето на две држави – Израел и Палестина.
„Хрватска треба да ја признае Палестина како чекор кон запирање на војната и хуманитарната катастрофа во Газа. Признавањето на правото на палестинскиот народ на сопствена држава е единствениот начин за воспоставување траен мир на Блискиот Исток“, рече Милановиќ. Тој најави дека ќе се залага Хрватска што поскоро да ја признае Палестина и ја повика Владата да ја започне постапката за признавање во Парламентот.
Министерот Агабекијан беше примен и од премиерот Андреј Пленковиќ. По средбата, тој изјави дека Хрватска силно го поддржува моменталниот прекин на огнот во Газа.
„Се залагаме за итен прекин на огнот, ослободување на заложниците, заштита на цивилите и непречено доставување помош до ранливото население, особено децата“, рече Пленковиќ.
Тој додаде дека хрватската влада останува доследна на својата позиција дека траен мир и безбедност на Блискиот Исток може да се постигнат само преку решение за две држави, во кое Израел и Палестина би живееле еден до друг „во мир, безбедност и достоинство, во рамките на меѓусебно и меѓународно признати граници“.
Пленковиќ потсети дека Хрватска досега донирала речиси три милиони евра хуманитарна помош, вклучувајќи еден милион евра за децата од Газа преку УНИЦЕФ, и ја објави новата одлука на Владата за дополнителен милион евра помош.
