„Она што се случува во Газа ја потресе совеста на светот. Човечки предизвиканиот глад никогаш не може да биде оружје на војна. Мора да престане. Помошта на ЕУ за Газа далеку ја надминува онаа на кој било друг партнер. Но, секако, Европа мора да направи повеќе. Еве ги мерките за патот напред“, објави Урсула фон дер Лајен.
Мерките што ги објави Урсула фон дер Лајен вклучуваат: Пауза на билатералната соработка без загрозување на граѓанското општество и Јад Вашем.
Потоа предлага нови санкции за екстремистичките министри и насилните доселеници, како и делумно суспендирање на договорот за асоцијација за прашања поврзани со трговијата.
Екстремистичките министри кои обично се предмет на санкции се министерот за внатрешни работи Итмар Бен Гвир и министерот за финансии Безалел Смотрич. Нелегалните доселеници на окупираниот Западен Брег вршат насилство и го протеруваат палестинското население. Одредени земји од ЕУ веќе воведоа санкции врз Бен Гвир и Смотрич.
Најавата на фон дер Лајен дека ЕУ ќе воведе санкциони врз клучни израелски функционери и доселеници предизвика аплауз низ целата сала, особено од групата облечена во црвено во знак на солидарност со Газа.
Но, тоа предизвика и негодување на десната страна од салата, каде што седат пратеници како оние од германската крајно десничарска AfD. Се слушнаа неколку извици на германски јазик, а публиката и европратениците ги замолчија интервенциите.
Третата мерка е формирање на Донаторска група за Палестина, која ќе вклучува одредени елементи за обнова на Газа.
Треба да се напомене дека претходно предложените санкции против Израел од страна на Европската комисија вклучуваа исклучување од програмата на ЕУ Хоризонт, која се однесува на научна соработка. Овие мерки беа блокирани од некои членови предводени од Германија.
