Претседателот на Украина, Володимир Зеленски, изјави дека идејата за можна средба со претседателот на САД, Доналд Трамп, и претседателот на Русија, Владимир Путин, во Будимпешта нема да биде позитивна за Украина, бидејќи Унгарија ги блокира сите иницијативи што и користат на Украина, и додаде дека планот е да се набават 25 системи „Патриот“.
За време на разговорот со новинарите, Зеленски рече дека ја пренел оваа порака и на специјалниот пратеник на американскиот претседател, Стив Виткоф, објави јавната служба на Украина, Суспилна.
„Имаше многу достојни опции – Швајцарија, Австрија, Ватикан, Саудиска Арабија, Катар, Туркије. Бидејќи тука зборуваме за мир во Украина, а не за избори во Унгарија. Не верувам дека премиер кој нè блокира насекаде може да донесе нешто позитивно или барем избалансирано“, рече украинскиот претседател.
Тој додаде дека унгарскиот премиер Виктор Орбан промовира проруска реторика, вклучително и тврдења за „безусловна предност“ на Русија во оваа војна.
„Кога зборуваме за медијација, не мислам дека унгарскиот премиер има соодветен пристап кон таа улога. Сакам да ве потсетам дека кога патуваше во Русија, Кина и САД обидувајќи се да го зајакне своето политичко влијание, ние јасно рековме дека не му дадовме никакви овластувања. Неговите обиди не дадоа резултати, што беше јасно од самиот почеток“, рече Зеленски.
Зборувајќи за меморандумот од Будимпешта од 1994 година, со кој големите сили го гарантираа територијалниот интегритет на Украина во замена за откажување од нуклеарно оружје, Зеленски потсети дека тој документ не е ефикасен и додаде дека го потсетил и Трамп на ова.
Сепак, според Зеленски, Трамп го гледа „унгарскиот формат“ како можен следен чекор што, според него, би можел да донесе резултати, вклучително и крај на војната.
„Го делиме оптимизмот со претседателот Трамп, доколку тоа доведе до крај на војната. По повеќе од два часа разговор со него и неговиот тим, мојот впечаток е дека неговиот став е дека линијата на фронтот останува таму каде што е, што може да биде позитивен сигнал, ако сите страни го разберат“, рече Зеленски.
Зеленски, исто така, нагласи дека за време на неговата посета на Вашингтон, разговарал за можноста за потпишување договор за купување на 25 американски системи за воздушна одбрана „Патриот“, кои Украина би ги добила во фази во текот на наредните години.
Како што изјави, тој број системи го побарале Воздухопловните сили на Украина, но испораките нема да бидат веднаш поради големата побарувачка и постојните нарачки од други земји.
Тој додаде дека во клучните земји-членки на НАТО постојат системи „Патриот“ кои формално им припаѓаат на САД и дека Украина може да ги добие овие системи ако има политичка поддршка од Вашингтон.
Планирано е средствата за купување на 25 системи делумно да се обезбедат од користењето на замрзнатите руски средства, а финансиската основа за овој план е веќе подготвена, рече тој.
