Најмалку три лица загинаа, а неколку се повредени во земјотресот со јачина од 5,7 степени по Рихтер што го погоди Бангладеш во петокот.
Зградите беа оштетени во многу области, вклучувајќи ја и Дака, густо населената престолнина, а земјотресот беше почувствуван и во Индија.
Жителите на Дака истрчаа од своите домови додека зградите се тресеа, а некои се урнаа. Три лица загинаа кога шесткатна зграда се урна за време на земјотресот, пишува Ројтерс.
„Почувствувавме силен земјотрес, а зградите се тресеа како дрвја. Скалите беа преполни со луѓе што трчаа надвор. Сите беа преплашени, децата плачеа“, рече Суман Рахман од Дака.
Садман Сакиб, кој работи во приватна компанија во Дака, рече дека никогаш во животот не почувствувал таков земјотрес.
„Бевме во канцеларијата кога мебелот почна да се тресе. Брзавме по скалите кон улицата и веќе видовме други луѓе на патот“, рече тој.
