Глобалниот индекс на огнева моќ не го мери само бројот на тенкови, авиони или војници. Рангирањето се базира на повеќе од 60 индикатори, вклучувајќи го воениот буџет, бројот на активни и резервни војници, логистичките капацитети, бројот и разновидноста на оружје, инфраструктурата, достапноста на природни ресурси, како и геостратешката положба на земјата.
Технолошкото ниво исто така се зема предвид, што значи дека земјите со пософистицирани системи за команда и контрола, напредни дронови и сајбер капацитети имаат значителна предност.
Според годишниот преглед за 2025 година, од 145 земји чии воени капацитети се вклучени во индексите за мерење, Македонија, или вооружените сили на Македонија, е на 112-то место.
Од друга страна, меѓу земјите од регионот, најдобро рангирана е Србија, која е на 63-то место, по неа следуваат Хрватска на 74-то место и Словенија на 96-то место. Босна и Херцеговина е позиционирана на 132-то место, додека Црна Гора е на 127-мо место.
Десетте земји со најголема воена моќ според индексот за 2025 година се САД, Русија, Кина, Индија, Јужна Кореја, Обединетото Кралство, Франција, Јапонија, Турција и Италија.
