Министерот за надворешни работи Тимчо Муцински оствари низа значајни средби и активности во рамки на работната посета на Истанбул, при што фокусот беше ставен на унапредувањето на економската соработка, регионалната стабилност и продлабочувањето на билатералните односи меѓу Северна Македонија и Турција.
Во Скопје, пред посетата, Муцински одржа работна средба со Управниот одбор на Македонско-турската стопанска комора (MATTO), каде што се разговараше за институционална поддршка на компаниите, зголемување на извозот, создавање нови извозни капацитети и привлекување странски инвестиции. Двете страни изразија заедничка подготвеност за поинтензивна соработка преку конкретни иницијативи за јакнење на трговските односи.
Истата определба министерот ја истакна и на средбата со Советот на странски инвеститори, нагласувајќи дека Владата и надлежните институции се активен и одговорен партнер на бизнис-секторот. Притоа, беше потенцирана и улогата на дипломатско-конзуларните претставништва, кои се целосно ставени во функција на економската дипломатија.
На маргините на Вториот министерски состанок на Балканската платформа за мир во Истанбул, Муцински оствари билатерална средба со турскиот министер за надворешни работи Хакан Фидан. Разговорите беа насочени кон билатералните односи, економската и инвестициската соработка, како и кон заедничката заложба за стабилен и просперитетен регион, при што беше потврдено и силното сојузништво во рамки на НАТО.
На самиот состанок на Балканската платформа за мир, министерот истакна дека стабилноста не се создава со декларации, туку со реалистична политика, практична соработка и конкретни резултати. Тој ја нагласи важната улога на Турција како регионален сосед и економски партнер и потенцираше дека кредибилитетот на регионалните иницијативи се мери преку нивната реална примена.
Во рамки на посетата, Муцински, заедно со колегите министри од регионот, оствари и средба со претседателот на Турција, Реџеп Таип Ердоган, на која се разговараше за билатералните односи и пошироките регионални предизвици. Соговорниците се согласија дека зајакнувањето на солидарноста и меѓусебното разбирање е клучно за иднината на Балканот.
Министерот го посети и Генералниот конзулат на Северна Македонија во Истанбул, каде што по целосната реконструкција на просториите се очекува унапредување на квалитетот и ефикасноста на конзуларните услуги. Воедно, тој се сретна и со македонски и турски стопанственици, нагласувајќи ја нивната важна улога во зајакнувањето на економските и трговските врски меѓу двете земји.
