По силниот земјотрес што го погоди Истанбул дел од жителите ја поминаа ноќта во општинските спортски сали и јавните паркови, јавува Анадолу.
Вчера Истанбул го погоди земјотрес со јачина од 6,2 степени според Рихтеровата скала, а според официјалните информации, најмалку 236 лица се повредени при обид да бегаат поради паника.
Епицентарот на земјотресот е регистриран во подрачјето на Силиври кај Истанбул, соопшти Управата за вонредни ситуации (АФАД).
Земјотресот се случи во 12:49 по локално време и беше силно почувствуван низ целиот Истанбул, кој има над 15 милиони жители, како и во соседните области, предизвикувајќи масовно напуштање на објектите.
Министерот за внатрешни работи Али Јерликаја информираше дека земјотресот се случил на длабочина од околу 7 километри и траел 13 секунди.
Според канцеларијата на гувернерот, повредени се 236 лица, претежно при обид да скокаат од височини поради страв, но ниеден не е во животна опасност.
„До 17:55 часот регистрирани се вкупно 127 последователни потреси, а најсилниот беше со јачина од 5,9 степени“, изјави Јерликаја.
Министерот за животна средина, урбанизам и климатски промени, Мурат Курум, информираше дека преку линијата за итни случаи 112 примени се 378 пријави за структурни оштетувања, а девет куќи се идентификувани како небезбедни и ќе бидат евакуирани.
АФАД соопшти дека нема пријави за загинати или целосно урнати објекти, а сите надлежни институции и спасувачки тимови се мобилизирани на терен.
Од канцеларијата на гувернерот предупредија да не се влегува во оштетените згради, да се избегнува непотребно користење на возила и мобилните мрежи да се користат само во итни случаи. 
