Американскиот претседател Доналд Трамп потпиша извршна наредба со која официјално се укинуваат долготрајните економски санкции против Сирија, кои беа во сила од 2004 година. Одлуката е објавена од портпаролката на Белата куќа, Каролин Ливит, за време на дневниот брифинг.
„Овој потег има за цел да го поддржи патот на Сирија кон стабилност и мир. Санкциите кон земјата се укинуваат, но остануваат активни мерките против поранешниот претседател Башар ал-Асад, неговите најблиски соработници, злоупотребувачи на човекови права, трговци со дрога, учесници во хемиско оружје, ИСИС и иранските посредници“, изјави Ливит.
Одлуката доаѓа само еден месец по инвестицискиот форум во Ријад, каде Трамп првпат најави укинување на санкциите и одржа историска средба со новиот сириски претседател Ахмед ал-Шара — прва средба на американски и сириски лидер од 2000 година.
Сегашниот претседател на Сирија, Ахмед ал-Шара, дојде на власт на почетокот на 2025 година, по заминувањето на Башар ал-Асад, кој избега во Русија на 8 декември 2024 година. Со тоа заврши речиси шестдецениското владеење на партијата Баас.
