Хамас ги отфрли обвинувањата на Стејт департментот за планиран напад врз цивили во Газа

Хамас ги отфрли обвинувањата во предупредувањето издадено синоќа од американскиот Стејт департмент, во кое групата беше обвинета дека има намера да им наштети на луѓето во Газа и дека тоа би претставувало кршење на договорот за прекин на огнот.

Во соопштението, Хамас тврди дека „полициските сили во Газа, со широка помош од жителите, ја исполнуваат својата национална должност со гонење на милициите и нивно повикување на одговорност во согласност со јасни закони, со цел да се заштитат жителите и имотот“.Во соопштението понатаму се наведува дека фактите на терен се спротивни на тврдењата на САД:

„Окупаторските власти [Израел] беа тие што ги основаа, вооружаа и финансираа криминалните милиции што извршија убиства и киднапирања и крадеа камиони со хуманитарна помош“.

Хамас додаде дека обвинувањата од САД „се во согласност со израелската пропаганда што обезбедува покритие за продолжување на окупациските злосторства“.

Да потсетиме дека американскиот Стејт департмент тврди дека има веродостојни извештаи дека Хамас планира непосреден напад врз цивилите во Газа, што, според нив, би го прекршило договорот за прекин на огнот.

Во вчерашното соопштение, кое го пренесе Би-Би-Си, се вели дека планираниот напад врз Палестинците би претставувал „директно и сериозно“ кршење на договорот за прекин на огнот и „ќе го поткопа значајниот напредок постигнат преку медијациските напори“.

Стејт департментот не даде дополнителни детали за нападот и не е јасно на кои извештаи се осврнува.