Поранешниот шеф на антитерористичката единица на Мосад, Одед Еилам, во изјава за израелскиот канал Кешет 12 истакна дека постигнатиот договор за Газа, иако претставува победа за Израел, всушност ја зајакнува геополитичката улога на Турција.
„Турција не учествуваше во преговорите од самиот почеток, но кога беше повикана, постигна она што Катар, Египет и САД не успеаја,“ изјави Еилам.
Тој додаде дека Анкара успеала да изврши притисок врз раководството на Хамас преку претходно подготвени канали за повлекување, што довело до тоа Хамас „повеќе да ѝ се предаде на Анкара отколку на Вашингтон“.
Еилам предупреди дека Израел треба да биде претпазлив:
„Иако овој пат се слуша гласот на Анкара во име на мирот, зад него се кријат одгласи на смел геополитички потег. Ако Медитеранот е шаховска табла, Ердоган постави не само кралица, туку цела флота.“
Во својата анализа, тој истакна дека Турција веќе не е само посредник, туку „главен играч и еден од архитектите на новиот поредок“.
Еилам потсети и на проширувањето на турско-египетската воена и безбедносна соработка, како и на засилената турска флота со подморници, носачи на авиони и офанзивно оружје. Според него, земји како Израел, Грција и Кипар сега се соочуваат со „оживеана отоманска визија“.
„Ердоган има длабока желба да ја оживее Отоманската империја и да се позиционира како современ султан,“ изјави Еилам, додавајќи дека американскиот претседател Доналд Трамп со својата поддршка одигра клучна улога во процесот.
Според него, Курдите би можеле повторно да бидат „жртвен јарец“ на новата регионална стратегија.
