Марк Линч, кој се обидува да го победи сенаторот Линдзи Греам на републиканските прелиминарни избори и да стане републикански кандидат за сенатор од Јужна Каролина, во нов пост го доведе во прашање статусот на Aja Софија и се закани со санкции кон Турција сè додека не ја претвори во црква.
„Под водство на Линдзи Греам, познатата христијанска катедрала Света Софија им беше предадена на муслиманите во 2020 година, наводно во име на Обединетите нации. Наместо да се спротивстави на предавањето на Света Софија на муслиманите, Линдзи Греам молчеше. Тој дури и не им се закани на Обединетите нации, ниту ја употреби својата политичка моќ против Турција за да го спречи ова „киднапирање““, напиша Линч.
Ова е неточна информација бидејќи Турција донесе суверена одлука да ја претвори Aja Софија од музеј повторно во џамија.
„Претворањето на Света Софија во џамија беше една од најголемите неправди во христијанската историја. Катедралата им припаѓа на христијаните и ќе биде вратена, под мој надзор, на христијаните, во сопственост на Грчката православна црква. Соединетите Американски Држави увезоа стока во вредност од 17,52 милијарди долари од Турција во 2025 година. Штом станам нов сенатор од Јужна Каролина во Сенатот на САД, ќе предложам закон со кој ќе се забрани целиот увоз од Турција сè додека Света Софија не им се врати на христијаните. Законот што ќе го предложам ќе се вика „Закон за враќање на Света Софија во црквата“. Ќе ги поканам сите христијански свештеници (православни, католици и протестанти) во американскиот Капитол на денот кога ќе биде поднесен законот за да извршам притисок врз Конгресот да донесе закон со кој ќе се забрани целиот увоз од Турција (над 17 милијарди долари годишно) сè додека сопственоста на Света Софија не се пренесе на Грчката православна црква“, напиша Линч во објавата.
Тој изјави дека како сенатор ќе се бори за „спречување на преземањето на христијанските цркви од страна на исламот, особено во Соединетите Американски Држави“.
