Католичката црква во Германија доживува сериозна кадровска криза. Во епархијата Фулда, која се смета за симболичен центар на германското христијанство, минатиот викенд беа ракоположени само три нови свештеници и не се очекуваат повеќе кандидати во следните седум години, пишува Фулдер Цајтунг.
Во 2024 година, во целата земја беа ракоположени само 29 свештеници, а во 11 од 27-те епархии – ниту еден. За споредба, во 1962 година беа ракоположени 557 луѓе, во 2005 година – 122.
Денес, во Германија живеат околу 20 милиони католици, но многу парохии веќе се спојуваат во поголеми поради недостиг на персонал. Само во епархијата Лимбург, во последните пет години беа затворени 18 цркви.
„Се чини дека со намалувањето на членството, црквата е повеќе загрижена за управување со недостигот и реорганизирање на големи здруженија отколку за тоа како да привлече повеќе луѓе во црквата“, изјави за БИЛД, Уве Бекер, поранешен пастор во Франкфурт на Мајна.
Црквата забележува дека младите луѓе повеќе не се желни да станат свештеници.
„Слободата денес значи да не се обврзувате. Без брачни завети. Без работа за цел живот. Без вера со обврски. Но, да се биде свештеник значи токму тоа – целосно да се обврзете“, објасни за БИЛД капуцинскиот монах брат Паулус.
Во меѓувреме, дел од недостигот го пополнуваат свештеници од странство. Според „Статиста“, секој петти католички свештеник во Германија е роден во друга земја.
