Во саботниот напад врз меѓународниот аеродром „Крал Калид“ во Ријад, Саудиска Арабија, загинале најмалку 12 лица, а 309 биле повредени, соопшти Саудиската генерална управа за цивилно воздухопловство, пренесува Асошиејтед прес. Дел од повредените се во критична состојба.
Меѓу загинатите има четворица државјани на Саудиска Арабија, двајца од Бангладеш и по еден државјанин на САД, Египет, Јордан, Сирија, Палестина и Судан.
Според регионален функционер, кој за Асошиејтед прес зборувал под услов да остане анонимен, проектил погодил дел од терминалскиот комплекс наменет за домашни летови, во кој се наоѓаат терминалите 3 и 4.
По нападот, саудиските власти го прекинале работењето на аеродромот, а летовите биле пренасочени кон други аеродроми. САД, Велика Британија, Германија, Австралија и Канада ги предупредиле своите државјани да го избегнуваат аеродромот.
Хутите ја презедоа одговорноста за претходните напади
Хутите, кои имаат поддршка од Иран, претходно во текот на неделата ја презедоа одговорноста за напади врз истиот аеродром. По саботниот напад, засега не објавиле непосредна реакција.
Нападите се интензивирале откако коалицијата предводена од Саудиска Арабија започнала голема воена офанзива против Хутите во Јемен.
Трамп: Ќе донесеме одлука брзо
Американскиот претседател Доналд Трамп изјави дека ја разгледува можноста САД да им се приклучат на саудиските напади врз Хутите.
„Можеби. Ќе го разгледаме тоа. Токму сега дознавме за последниот напад. Ќе донесеме одлука. Дејствуваме брзо“, изјави Трамп.
Претходно, запрашан за нападот врз аеродромот во Ријад, Трамп го оцени како „ужасен“, а на прашањето дали САД ќе се вклучат во конфликтот, одговори: „Ќе дознаете“.
Според податоците на страницата „ФлајтАвер“, кои ги пренесува Асошиејтед прес, во текот на последните 24 часа на аеродромот во Ријад биле откажани најмалку 291 лет.
