Најмалку едно лице е убиено, а десетици полицајци се повредени во ноќешните протести во Перу против претседателот Хозе Хери, кој ја презеде власта пред само неколку дена, соопшти канцеларијата на народниот правобранител во петокот.
Владата ќе прогласи вонредна состојба во главниот град Лима во рок од неколку часа и подготвува пакет мерки за справување со растечката несигурност, изјави премиерот Ернесто Алварез на прес-конференција доцна во четвртокот.
Протестот, на кој повикаа младите демонстранти од Генерација З, транспортните работници и здруженијата на граѓани, беше најновиот во серијата демонстрации против корупцијата и растечкиот криминал во земјата што доведоа до драматично соборување на поранешната претседателка Дина Болуарте минатата недела.
Илјадници демонстранти се собраа низ целата земја, а стотици се судрија со полицијата пред Конгресот во Лима. Полицијата испука солзавец додека некои демонстранти фрлаа пиротехника, камења и запалени предмети.
„Сите мора да си одат!“ извикуваа демонстрантите додека оделе кон Конгресот и се обидувале да ги срушат металните бариери што ја штитат зградата, предизвикувајќи судир.
Едуардо Маурисио Руиз беше убиен за време на протестот и неговата смрт ќе биде истражена, изјави Фернандо Лосада, претставник на канцеларијата на Народниот правобранител.
Канцеларијата на обвинителството на Перу соопшти дека Руиз починал откако бил застрелан.
Хери го изрази своето жалење за смртта на Руиз во објава на X, велејќи дека смртта ќе биде истражена „објективно“. Тој ги обвини криминалците кои се инфилтрирале во мирните демонстрации за да посеат хаос.
„Врз нив ќе биде применета полната сила на законот“, напиша тој.
