31-годишниот Алајдин Сулејмани, кој беше тешко повреден во престрелката што се случи попладнево во близина на Полициската станица Бит Пазар, почина од последиците на повредите – пренесуваат медиумите.
Според информациите што ги пренесуваат македонските медиуми, Сулејмани од Арачиново им подлегнал на повредите во скопскиот Клинички центар.
При инцидентот, кој се случи околу 14 часот, две групи од по пет до шест лица пукале едни кон други. Престрелката предизвика бројни штети, а полицијата веќе презема мерки за расветлување на случајот.
Сулејмани беше сериозно ранет но за жал, не успеа да се опорави од тешките повреди. Властите се уште работат на расветлување на мотивите и на околностите на овој трагичен инцидент.
Од Министерството за внатрешни работи информираат дека околу 14 часот било пријавено пукање од огнено оружје на улицата „Војдан Чернодрински“. Полициските екипи излегле на терен и констатирале дека се работи за престрелка помеѓу две групи од по пет до шест лица. Едно лице е повредено и пренесено во Ургентниот центар при Клиничкиот центар „Мајка Тереза“, соопштија од МВР.
Според неофицијални информации, загинатиот жител на Арачиново е син на Назим Сулејмани-Аруша, поранешен командант на ОНА од скопското село, кој починал во 2018 година.
