⚠️ Кашмир на раб на нова војна: Пакистан и Индија пред нуклеарна криза
Тензиите меѓу Пакистан и Индија повторно кулминираат откако серија провокации и изјави од обете страни ја разгореа опасноста од нова војна — со можни нуклеарни импликации.
Пакистанскиот министер за одбрана, Хаваџа Асиф, остро реагираше на последниот напад во индискиот дел на Кашмир, во кој загинаа 26 лица, нарекувајќи го “лажна операција под индиско знаме”. Според него, Индија ја предизвикува кризата и ја турка регионот кон катастрофа.
„Ако има напад од целосен обем или нешто слично, тогаш секако ќе има војна од целосен обем,“ изјави Асиф. Тој нагласи дека пакистанската армија е подготвена за сè, додавајќи дека нивниот одговор ќе биде „пропорционален“ на евентуалните чекори на Индија.
Во меѓувреме, Индија направи чекор кој Пакистан одамна го има класифицирано како воен чин — ги затвори сите четири брани што го контролираат протокот на реката Инд, што директно го загрозува водоснабдувањето на Пакистан.
Како одговор, Министерството за надворешни работи на Пакистан објави серија остри мерки:
-
Суспендирање на сите визи за индиски граѓани, со рок од 48 часа да ја напуштат земјата;
-
Намалување на персоналот на индиската амбасада во Исламабад на 30 лица;
-
Затворање на воздушниот простор за сите индиски авиони;
-
И дополнителна потврда дека армијата е подготвена да го брани суверенитетот на државата од секој „неодговорен обид“.
Воената тензија е дополнително подгреана со преместувањето на голем број пакистански воени конвои кон границата со Кашмир. Медиумите јавуваат за засилено присуство на армијата во регионот, додека и меѓународната заедница почнува да изразува загриженост за ескалација на конфликтот меѓу две нуклеарни сили.
„Светот треба да биде загрижен. Војната меѓу две нуклеарни сили е секогаш причина за аларм,“ предупреди пакистанскиот министер за одбрана.
