– Американскиот Стејт департмент одобри потенцијална продажба на ракети и сродни елементи на Турција, објави Пентагон денес, известува Анадолу.
Проценетата потенцијална продажба е во висина од 304,1 милиони долари.
Станува збор за напредни ракети воздух-воздух со среден дострел (AMRAAM) AIM-120C-8 со проценета вредност од 225 милиони долари и ракети AIM-9X Sidewinder Block II со проценета вредност од 79,1 милиони долари.
„Оваа предложена продажба ќе ѝ обезбеди на Турција критичен капацитет за воздушна одбрана што ќе ѝ помогне во одбраната на нејзината татковина и американскиот персонал стациониран таму“, соопшти Пентагон.
Пентагон соопшти дека договорот ќе го води RTX Corporation со седиште во Аризона.
Агенцијата за соработка во одбраната и безбедноста ја издаде потребната потврда и денес го извести Конгресот за оваа можна продажба.
