Во трагичен настан што се случи синоќа во Прилеп, животите ги загубија три лица – 43-годишен маж, неговиот 11-годишен син и 63-годишниот сторител, кој по убиствата извршил самоубиство. Според првичните информации од Основното јавно обвинителство, мотивите за убиствата се поврзани со семејни недоразбирања и нерасчистени имотни односи.
Таткото и детето во попладневните часови (околу 15–16 ч.) пристигнале во домот на вујкото, кој се наоѓа на улицата „Стеван Апостолоски“ во центарот на градот. Иако претходно куќата била препишана токму на внукот, не е јасно што се случувало следните неколку часа. Според сведоштвата на соседи, пред пристигнувањето на полицијата околу 22 часот, се слушнале истрели.
Загрижена поради отсуството, сопругата на убиениот ја повикала полицијата. При обидот на службените лица да влезат во куќата, сторителот фрлил бомба која делумно експлодирала, но не предизвикала жртви.
Министерството за внатрешни работи ангажирало припадници на специјалната единица „Тигри“, кои успеале да влезат во објектот околу еден час по полноќ. Таму ги затекнале трите безживотни тела – на таткото, синот и вујкото кој се самоубил.
Она што дополнително ја потресе јавноста е информацијата дека убиецот пред нападот објавил вознемирувачка порака на социјалната мрежа Фејсбук, со која, според Обвинителството, ги најавил мотивите и укажал на својата намера.
Јавниот обвинител Стевчо Биноски, кој изврши увид на местото на трагедијата, потврди дека е наредена обдукција на телата, како и прибирање на докази, оружје и муниција за понатамошна анализа и вештачење.
Настанот предизвика голема вознемиреност кај прилепчани, особено поради фактот што полицијата реагирала со доцнење, иако заложничката криза, според неофицијални извори, траела со часови.
