🛑 Три активни пожари во Македонија – најкритично на планината Готен, интервенираат и словенечки пожарникари и чешки хеликоптер

Во моментов во Македонија има три активни пожари, соопштија денеска од Дирекцијата за заштита и спасување (ДЗС). Пет пожари се ставени под контрола, додека дваесет се веќе изгаснати, според податоците на Центарот за управување со кризи.

Најголем проблем претставува пожарот на планината Готен од беровска страна, кој се проширува на целосно непристапен терен. Во неговото гаснење се вклучени локални пожарникари од Берово, тимови од Национални шуми и ДЗС, како и жители од околните села.

Чешки хеликоптер повеќепати истурил вода врз најкритичните делови од пожарот, а од утринава таму се распоредени и словенечки пожарникари – конвој од 61 пожарникар со 18 специјализирани возила, кои се сместени на стадионот во Берово.

Како најпогоден извор за полнење на вода е утврдено вештачкото езеро Турија, кое се наоѓа на околу 10 километри воздушна линија од пожарот.

Директорот на ДЗС, Стојанче Ангелов, изјави дека ситуацијата е под внимателен надзор и дека сите капацитети се мобилизирани за сузбивање на огнената стихија.