Шведската активистка Грета Тунберг и уште 170 активисти од флотилата за Газа пристигнаа во Атина откако поминаа неколку дена во израелско заробеништво. На аеродромот во грчката престолнина, ги пречекаа неколку стотици луѓе кои мавтаа со палестински знамиња и аплаудираа додека излегуваа од авионот.
По пристигнувањето во Атина, Грета одржа краток говор на аеродромот.
„Можев долго, долго да зборувам за малтретирањето и злоупотребите во нашето заробеништво. Верувајте ми, но тоа не е темата на приказната. Израел го ескалира геноцидот и масовното уништување со геноцидна намера, обидувајќи се да збрише цела популација пред наши очи“, рече Грета.
Во еден момент, толпата скандираше дека се херои, но Грета ги прекина со зборовите: „Не, ние не сме херои, ние го правиме минимумот“.
„Овој и други геноциди се овозможени благодарение на нашите влади, институции, медиуми и компании. Наша одговорност е да го прекинеме тоа соучесништво“, додаде таа.
Инаку, според информациите од европските министерства за надворешни работи, повеќето од ослободените активисти ќе бидат префрлени со авион во Грција, од каде што ќе го продолжат своето патување кон своите матични земји.
Меѓу нив се 28 француски, 27 грчки, 15 италијански и девет шведски државјани. Дваесет и еден Шпанец веќе беа вратени во Мадрид во неделата, додека најмалку 28 други шпански државјани се во израелски притвор.
Ве потсетуваме дека во јавноста се појави информација дека Грета Тунберг била принудена да држи израелски знамиња додека била фотографирана за време на притворот. Во истиот документ се наведува дека Тунберг им кажала на шведските дипломати дека имала ограничен пристап до вода и храна во затворот и дека страдала од дехидрација и осип предизвикан од креветни бубачки во нејзината ќелија.
„Грета рече дека била принудена да седи на тврди површини подолг временски период, немала доволно храна или вода и била подложена на суров третман“, се вели во дипломатскиот извештај.
Исто така, се наведува дека израелските војници „ја влечеле Грета за коса, ја тепале и ја принудиле да го бакне израелското знаме“.
