Во видео обраќање објавено на мрежата X, Нетанјаху се потсети на зборовите на нацистичкиот министер за пропаганда Јозеф Гебелс:
„Гебелс велеше дека колку е поголема лагата, толку побрзо се шири. Сега некој измисли монструозна голема лага, дека Израел имал некаква врска со ужасното убиство на Чарли Кирк. Ова е лудо. Тоа е лага. Тоа е срамно.“
Премиерот нагласи дека Кирк е меѓу најпосветените пријатели на Израел на американската политичка сцена.
„Чарли секогаш стоеше покрај Израел. Разговаравме многу пати, а неодамна го поканив да го посети Израел. Дури и кога имаше забелешки или изразуваше различни мислења, знаев дека тоа доаѓа од срце – од неговата љубов кон Израел и еврејскиот народ. Тоа беше Чарли, тоа е суштината на слободната земја“, рече Нетанјаху.
Тој додаде дека се шират „одвратни гласини“ и посочи дека тие може да бидат поттикнати од оние кои имаат опсесија или дури и финансиска поддршка од Катар, додека неговите најблиски соработници се соочуваат со критики за наводни плаќања од Катар.
„Чарли заслужува чест, а не лаги“, заклучи Нетанјаху, нагласувајќи дека Израел ќе продолжи да го негува споменот на американскиот активист како искрен и страствен застапник на израелскиот народ.
