Познатиот британски водител Пирс Морган во средата остро ѝ се спротивстави на амбасадорката на Израел во Велика Британија, Ципи Хотовели, тврдејќи дека израелската влада „крие нешто“ во врска со настаните во Газа.
Морган ја праша амбасадорката зошто Израел не им дозволува на странските новинари пристап до Газа, која е под опсада од нападот на Хамас на 7 октомври 2023 година, во кој беа убиени 1.200 Израелци.
Според Министерството за здравство на Газа, повеќе од 54.000 Палестинци беа убиени за време на израелската офанзива.
Во март, Израел воведе блокада на територијата, за која Синди Мекејн, раководителка на Светската програма за храна, рече дека предизвикала хуманитарна „катастрофа“.
Морган ја праша Хотовели:
„Зошто не им дозволувате на меѓународните новинари да влезат во Газа за да известуваат фер и слободно, без ИДФ да ги води за рака? Пуштете ги новинарите внатре, затоа што им забранивте, а единствената причина зошто сè уште не им дозволувате да влезат не е нашата безбедност, како што „толку убаво“ кажавте. Причината е што не сакате западните новинари да влезат и да видат што навистина се случува.“
Морган додаде дека ако новинарите имаат пристап до Газа, ќе можат да известуваат за вистинската скала на цивилните жртви.
Амбасадорката рече:
„Од моја гледна точка, штом повеќе нема да има никаква закана за нивните животи, сигурно ќе им биде дозволено да влезат.“
Потоа дојде брутален одговор од Морган:
„Ах, каков празен изговор, амбасадорке. Ве молам, не се однесувајте кон нас како кон будали. Ние не сме будали. Не го правите тоа за наша безбедност. Им забранивте на новинарите да известуваат за тоа што навистина се случува. Само вие знаете зошто го правите тоа. Можеби правите сè сосема фер. Можеби тоа е најморалната војна што некогаш се водела во историјата, како што постојано велите. Но, колку подолго трае без присуство на новинари, толку помалку луѓе веруваат во тоа и толку повеќе луѓе мислат дека криете нешто.“
