Израелскиот министер за национална безбедност Итамар Бен Гвир денес изјави дека сирискиот привремен претседател Ахмед Aлшара треба да биде „елиминиран“ поради конфликтот меѓу сириските сили и заедницата Друзи.
„Страшните слики од Сирија докажуваат едно: еднаш џихадист, секогаш џихадист. Со оние што убиваат, понижуваат и силуваат не треба да се преговара. Единственото решение со ал-Џеулани (Ал- Шаара) е да се елиминира“, рече Бен Гвир во објава на X.
Тој исто така рече дека ги „сака“ израелските Друзи, додавајќи дека „главата на змијата мора да се отсече“.
Порано денес, сириската новинска агенција Сана објави дека најмалку едно лице е убиено, а 18 се повредени во израелските напади врз Дамаск.
Во исто време, израелската војска објави видеа од најновите напади во Сирија, насочени кон седиштето на Генералштабот во Дамаск и уште една „воена цел“ во близина на Претседателската палата.
Израелските одбранбени сили соопштија дека воениот штаб го користеле сириските владини сили за испраќање војници во градот Сувејда за да воспостават ред по судирите меѓу вооружените групи Друзи и Бедуини во кои загинаа најмалку 30 лица.
Началникот на израелскиот Генералштаб, Ејал Замир, најави зголемување на бројот на војници на границата со Сирија и засилување на капацитети за надзор и офанзивни капацитети.
Тој ѝ нареди на Северната команда на Израел да ги пренасочи силите од Газа кон сириската граница за да се „зголеми стапката на напади“ и да ги запре нападите врз Друзите во Сирија, објави „Тајмс оф Израел“.
Судирите меѓу сириските владини трупи и локалните борци од Друзите продолжија во јужниот сириски град Свеида, само неколку часа по објавувањето на прекинот на огнот.
