Палестинскиот атлетичар Алам Абдула ал-Амур, бронзен медалист на Првенството на Западна Азија 2023 година во трката на 3000 метри, е убиен од израелските сили во близина на центар за помош крај Хан Јунис, во јужниот дел на Газа.
Палестинската атлетска федерација соопшти дека ал-Амур загинал под израелска стрелба додека се обидувал да набави храна за своето семејство, во услови на тешка хуманитарна криза во енклавата.
Неговото семејство изјави дека тој бил „убиен од израелската армија покрај т.н. американски центри за помош“, кои меѓународни организации ги опишуваат како „смртоносни замки“.
Според податоци на палестинското Министерство за здравство, до 27 мај најмалку 2.158 лица биле убиени додека се обидувале да добијат помош.
И претходно беа убиени палестински спортисти – кошаркарот Мохамед Шаалан и поранешниот атлетичар Суфјан Хамдан, исто така во потрага по храна.
Претседателот на Палестинската фудбалска федерација, Џибрил Раџуб, изјави дека од почетокот на војната во Газа досега загинале 774 палестински спортисти, меѓу кои 355 фудбалери, а 288 спортски објекти биле целосно или делумно уништени.
