„Индија е целосно посветена на суверенитетот, територијалниот интегритет и независноста на Авганистан. Поблиската соработка меѓу нас придонесува за вашиот национален развој, како и за регионалната стабилност и отпорност“, рече министерот и додаде дека индиската техничка мисија во Кабул се надградува во амбасада.
Оваа одлука доаѓа по посетата на авганистанскиот министер за надворешни работи, Амир Кан Мутаки, на Индија.
Патувањето на Мутаки беше овозможено откако Комитетот на Советот за безбедност на ОН привремено ја укина забраната за патување за него за да му овозможи да учествува во дипломатски ангажмани во странство.
Според Ројтерс, ова претставува значаен потег што ги проширува дипломатските врски со земјата управувана од талибанците.
Индија ја затвори својата амбасада во Кабул откако Талибанците ја презедоа власта во 2021 година, но отвори мала мисија една година подоцна за олеснување на трговијата, медицинската поддршка и хуманитарната помош.
Околу десетина земји, вклучувајќи ги Кина, Русија, Иран, Пакистан и Турција, имаат амбасади што работат во Кабул, иако Русија е единствената земја што формално ја признала администрацијата на Талибанците.
Индија и Авганистан историски имаат пријателски односи, но Њу Делхи не ја признава владата на Талибанците.
Западните дипломати изјавија дека патот на талибанската администрација кон признавање е блокиран поради ограничувањата за жените.
