Минатата недела, германската влада објави брошура во која се наведуваат „антисемитски симболи“, објави „МЕЕ“. Публикацијата со наслов „Криење на пораката на антисемитските кодови и шифри“ е издадена од Федералната канцеларија за заштита на Уставот.
Според агенцијата, целта на брошурата е да се подигне свеста за суптилните форми на антисемитизам. Покрај симболите од нацистичката ера, во публикацијата се вклучени и примери поврзани со палестинскиот активизам и критики кон воените дејства во Појасот Газа.
Делот кој се однесува на „секуларен пропалестински екстремизам“ вклучува и илустрација на лубеница, чии бои асоцираат на палестинското знаме. Брошурата е наменета за наставници, кои може да ја користат како дополнителен едукативен материјал, како и за персонал во образовните институции за препознавање на различни форми на екстремизам.
Покрај лубеницата, во листата се наведуваат и други визуелни материјали кои се интерпретираат како политички пораки поврзани со конфликтот во Газа. Меѓу нив се илустрации кои прикажуваат страдање на деца и сцени поврзани со медицински установи.
