Палестинското движење Хамас испрати писмо до американскиот претседател Доналд Трамп во кое бара 60-дневен прекин на огнот во Газа во замена за ослободување на половина од заложниците што се држат таму, објави „Фокс њуз“, повикувајќи се на висок функционер од администрацијата на Трамп.
„Хамас му напиша писмо на претседателот Трамп, барајќи од него лично да гарантира 60-дневна пауза во Газа во замена за итно ослободување на половина од заложниците“, напиша главниот странски дописник на „Фокс њуз“ во окупираниот Ерусалим, Треј Јингст.
Писмото, кое сè уште не е потпишано од палестинското движење, но би можело да биде потпишано во наредните денови, се чува во Катар и ќе му биде предадено на американскиот претседател подоцна оваа недела, објавија Канал 12 и Фокс њуз.
Катар ги прекина напорите за посредништво за размена на преостанатите 48 израелски заложници по агресијата на Израел врз оваа држава од Персискиот Залив на почетокот на септември. Нападот врз главниот град на Катар предизвика меѓународна осуда, вклучително и од Русија и Украина, и ги зголеми тензиите во преговорите.
Предлогот на Хамас е во согласност со претходните иницијативи на медијаторите, вклучувајќи ги Катар, Египет и САД.
Во меѓувреме, среде обновената израелска воена кампања во Газа, болниците во опколената енклава примија 61 смртен случај и 220 нови ранети во изминатите 24 часа. Вкупниот број на жртви на израелската агресија од 7 октомври 2023 година достигна 65.344 смртни случаи и 166.795 ранети.
