Станува збор за активистите Саиф Абу Кешек и Тијаго Авила, кои моментално се во затвор во Ашкелон, на југот на Израел. Двајцата беа дел од флотилата „Глобал Сумуд“, група бродови што испловија од Франција, Шпанија и Италија за да достават хуманитарна помош до луѓето од Газа.
„Израел мора веднаш и безусловно да ги ослободи членовите на флотилата „Глобал Сумуд“, Саиф Абу Кешек и Тијаго Авила, кои беа пресретнати во меѓународни води и донесени во Израел каде што и понатаму се држат без обвинение“, изјави портпаролот на Канцеларијата за човекови права на ОН, Тамин Ал-Хитан.
Тој нагласи дека „не е кривично дело да се покажува солидарност и да се обидува да се достави хуманитарна помош на палестинското население во Газа, на кое му е очајно потребна“.
Абу Кешек и Авила ги обвинија израелските власти за малтретирање за време на нивниот притвор. Според извештаите, двајцата активисти штрајкуваат со глад веќе шест дена.
