Бројот на загинати од разорните земјотреси во Венецуела се искачи на 1.450, додека повеќе од 46.000 лица се водат како исчезнати, соопшти висок владин претставник.
Повредени се околу 3.150 лица, а над 12.700 семејства се погодени. Оштетени или уништени се 774 згради, меѓу кои и 38 болници, додека дел од објектите веќе се обновуваат.
Спасувачките тимови, меѓу кои и меѓународни екипи, продолжуваат со извлекување преживеани од урнатините. Досега се пронајдени над 15.000 лица од списокот на исчезнати, а повеќе од 7,2 милиони килограми храна се дистрибуирани.
И покрај тешките услови, спасувачките операции продолжуваат, иако шансите за наоѓање преживеани значително опаѓаат по 72 часа од земјотресот.
Татко и син се спасени од урнатините на срушена зграда во венецуелската држава Ла Гваира, четири дена откако катастрофалните земјотреси ја погодија земјата.
Двајца мажи, видливо исцрпени и со заштитни маски на лицата, беа изнесени на импровизирани носилки, објави Ројтерс.
Ла Гваира е најтешко погодената област по земјотресите во средата.
Спасувањето на таткото и синот следеше по 12-часовна сложена операција за време на која тимовите користеа специјализирани камери за пребарување.
Во спасувачките операции учествуваат членови на француската цивилна одбрана и американскиот тим за пребарување и спасување од округот Ферфакс, Вирџинија, кои ги извлекоа мајката и нејзиното деветмесечно бебе од урнатините претходниот ден.
Член на француската цивилна заштита изјави дека и таткото и синот се многу ослабени, откако поминале четири дена под урнатините.
Најмалку 33 лица беа спасени во текот на викендот.
Експертите предупредуваат дека по 72 часа од земјотресот, шансите да се најде живо лице под урнатините нагло се намалуваат.
Земјотресите погодија најмалку седум федерални држави во Венецуела, а локалните власти пријавија повеќе од 430 последователни потреси.
