Весникот T24 објави анализa во која се цитира турскиот новинар Мустафа Балбај, изнесена за време на гостување во емисија на турски телевизиски канал. Во написот се отвора прашањето за можни значајни кадровски промени во врвот на турската надворешна политика.
Според Балбај, во Анкара сериозно се разгледува сценарио според кое претседателот Реџеп Таип Ердоган би го отстранил Хакан Фидан од функцијата министер за надворешни работи и на негово место би го назначил актуелниот директор на Националната разузнавачка организација (МИТ), Ибрахим Калин. Како што наведува Балбај, Калин би ја презел функцијата „со моќта и влијанието што ги стекнал преку разузнавачката служба“.
Колумнистот на весникот „Џумхуриет“ оценува дека ваквиот потег би имал за цел „ослободување на негативната енергија“ во власта и прераспределба на политичката одговорност во сферата на надворешната политика.
Балбај потенцира дека не станува збор за шпекулации или „празни информации зад сцената“, туку за сценарио кое активно се дискутира во владините кругови. Според него, Ердоган е веќе „целосно посветен на промени“ и делува радикално во својот пристап. Тој додава дека во моментот ниту еден министер не се чувствува сигурно, опишувајќи го системот на управување како модел во кој министрите се сведени на улога на „секретаријат“.
