Телевизијата „Сезџу ТВ“ се најде во центарот на јавна дебата откако во една од своите емисии беше критикуван настан во турскиот град Батман, на кој стотици девојчиња го одбележаа својот прв чекор во носењето хиџаб.
Водителката Симге Фистикоглу, коментирајќи ги снимките од настанот, изјави дека „дури и да размислувала 99 пати, не би можела да ги нормализира овие сцени“. Нејзините зборови предизвикаа бурни реакции на социјалните мрежи и критики од бројни корисници и јавни личности.
Фистикоглу исто така тврдеше дека децата биле „искористени за пропаганда“ и дека објавувањето на настанот на социјалните мрежи претставува „експлоатација“.
Најголем дел од реакциите беа насочени кон, како што беше оценето, двојните стандарди во однос на верските слободи. Многу граѓани посочија дека е неприфатливо да се таргетираат девојчиња кои носат хиџаб, се облекуваат скромно или јавно ги практикуваат своите верски убедувања.
Критичарите нагласија дека опишувањето на одлуката на девојчињата да носат хиџаб и поддршката од нивните семејства како „злоупотреба“ претставува навреда за милиони конзервативни семејства во Турција.
Во јавните реакции беше истакнато и дека оние кои често повикуваат на почитување на различните животни стилови не покажуваат иста чувствителност кога станува збор за религиозните определби и носењето хиџаб.
Дополнителни контроверзии предизвикаа и споредбите изнесени во емисијата за Авганистан. На социјалните мрежи бројни корисници коментираа дека постојат двојни аршини, наведувајќи дека „кога девојче ќе стави хиџаб тоа се нарекува злоупотреба, а кога станува збор за други избори, истите тие се бранат како лична слобода“.
Дебатата продолжува да предизвикува поделени реакции во турската јавност, отворајќи прашања за границите меѓу слободата на изразување, верските права и медиумското известување.
