Израелски воздушен напад уништи зграда во центарот на Бејрут, додека ракетите продолжуваат да ги погодуваат областите далеку од главните упоришта на Хезболах. Екипата на Би-Би-Си ја разбудила експлозија околу 5 часот наутро по локално време.
Еден час претходно, израелската армија издаде предупредување за евакуација на зградата и околината, велејќи дека ќе биде цел на објект поврзан со Хезболах. Засега нема информации за жртвите од нападот што се случи во близина на деловни згради и хотели во центарот на градот, пишува Би-Би-Си .
Војната во Либан започна на 2 март, кога Хезболах испука ракети кон Израел во поддршка на Иран во тековниот регионален конфликт. Израел одговори со бомбардирање, а потоа израелските сили влегоа во јужен Либан. Според либанското Министерство за здравство, од 2 март се убиени 912 лица, вклучувајќи најмалку 111 деца. Повеќе од еден милион луѓе беа принудени да ги напуштат своите домови, главно на југот и истокот од земјата и во јужен Бејрут, каде што Хезболах е најсилен.
Целосно срушена зграда
Зградата погодена денес во населбата Башура веќе беше цел во последните денови, а сега е целосно срамнета со земја. Видео снимките покажуваат како проектилот ја погодува основата на повеќекатната зграда, по што целата структура се урива за само неколку секунди. Населбата веднаш беше обвиткана во густ чад, остатоци беа расфрлани по улицата, а мирисот на горење беше во воздухот.
