Претседателот Владимир Путин присуствуваше на божиќната литургија на Руската православна црква рано во среда и ја пофали „светата мисија“ на своите војници во одбраната на Русија, поврзувајќи ја церемонијата со празнично обраќање за единство, добротворност и поддршка на вооружените сили.
Неговото појавување доаѓа во време кога војната, која Русија ја започна со тотална инвазија на Украина, се приближува кон крајот на својата четврта година, при што Кремљ го претставува конфликтот како национална мисија и во голема мера се потпира на патриотски и религиозен симболизам.
Православните божиќни служби се одржуваат околу полноќ и ги собираат правосалвните христијани на литургии, иако Путин често присуствувал на помали церемонии, вклучувајќи ги и оние во Кремљската катедрала.
Видеата го прикажуваат Путин во темно одело без вратоврска меѓу униформирани војници, заедно со нивните сопруги и деца, додека свештеници служеле литургија во црквата „Свети Ѓорѓи Победоносец“ во близина на Москва.
„Руските воини отсекогаш, како по Божја волја, ја извршувале оваа мисија за одбрана на Татковината и нејзиниот народ, спасување на Татковината и нејзиниот народ“, рече Путин во црквата по службата.
„Во сите времиња во Русија, луѓето ги гледале своите воини на овој начин, како оние кои, како по Божја волја, ја извршуваат оваа света мисија.“
Во божиќна честитка објавена претходно на веб-страницата на Кремљ, Путин ја пофали Руската православна црква и другите христијански деноминации за зајакнување на општественото единство и зачувување на историското и културното наследство на Русија.
Тој рече дека религиозните организации се фокусираат на милосрдие и добротворност, грижа за оние на кои им е потребна помош и поддршка на учесниците и ветераните од војната, која Москва ја нарекува специјална воена операција.
„Ваквата важна и неопходна работа заслужува најискрено признание“, рече Путин.
Путин присуствува на божиќните служби од 2000 година, често надвор од Москва, но откако започна војната, тој го одбележува празникот почесто во близина на главниот град, вклучително и во неговата државна резиденција, Ново-Огарјово.
