Заврши третата рунда преговори меѓу делегациите на Русија и Украина во Истанбул, а главниот резултат од преговорите е договор за продолжување на размената на војници, како и цивили, објави ТАСС.
Владимир Медински, помошник на рускиот претседател Владимир Путин и шеф на руската делегација на преговорите, по третата рунда изјави дека Русија ѝ понудила на Украина размена на најмалку 1.200 воени заробеници од двете страни, како и дека Киев треба да го разгледа прашањето за кратки прекини на огнот од 24 или 48 часа со цел да ги преземе ранетите и телата на загинатите војници.
Русија понуди да ги предаде телата на уште три илјади украински војници, додавајќи дека Москва досега ги вратила телата на повеќе од 7.000 украински војници во Киев, но исто така додаде дека неограничените медицински размени на тешко ранети и болни луѓе на фронтовската линија ќе продолжат.
Медински изјави дека руската делегација понудила Украина да формира три работни групи кои ќе работат онлајн.
Тој додаде дека санитарните тимови од двете страни се изложени на премногу голем ризик во „сивата зона“ на фронтот.
Двете страни разговарале за прашањето за враќање на цивилите раселени како резултат на воените операции.
Зборувајќи за ставовите изразени во меморандумите за време на претходните рунди, Медински рече дека тие се многу далеку една од друга и изрази надеж за оперативни контакти со украинската страна не само на ниво на делегации, туку и на ниво на работни групи.
Медински рече дека не сите раселени жители на рускиот Курски регион се вратени дома, но дека 30 од нив се приведени „од непозната причина“ и дека Киев мора да го разјасни нивниот статус.
Тој изјави дека сите хуманитарни договори од втората рунда се исполнети.
Секретарот на украинскиот Совет за национална безбедност и шеф на украинската делегација на преговорите, Рустем Умеров, по состанокот изјави дека Украина продолжува да инсистира на целосен и безусловен прекин на огнот како неопходна основа за ефикасна дипломатија.
Умеров предложил одржување состанок на лидерите до крајот на август
„Сега сме подготвени за прекин на огнот и за почеток на значајни мировни преговори. И од двете страни зависи да се согласат за овој основен чекор кон мирот. Нагласуваме дека прекинот на огнот мора да биде искрен. Мора да вклучува целосен прекин на нападите врз цивилите и критичната инфраструктура. Вистинските чекори се можни – и секоја страна мора да покаже конструктивен и реалистичен пристап“, рече Умеров.
Третата рунда преговори траеше околу 40 минути.
Пред почетокот на преговорите, се одржа приватна средба меѓу Умеров и Медински.
Турски претставници беа присутни и во палатата Чираган, каде што се одржаа преговорите.
