Американската и украинската делегација започнаа нов круг разговори во Саудиска Арабија, еден ден по средбата меѓу претставниците на САД и Русија во Ријад, јавува украинскиот јавен сервис „Суспилне“, пренесува Анадолу.
Според извештајот, агендата на разговорите останува непозната.
Во неделата, американските и украинските претставници се состанаа во Ријад за да разговараат за безбедноста на енергетските и инфраструктурните објекти. Украинскиот министер за одбрана, Рустем Умеров, ги опиша разговорите како „продуктивни и фокусирани“.
Американската и руската делегација вчера одржаа разговори зад затворени врати во Саудиска Арабија, при што новинарите беа замолени да го напуштат хотелот „Риц-Карлтон“, каде што се одвиваше средбата.
Портпаролот на Кремљ, Дмитриј Песков, изјави дека разговорите се однесувале и на иницијативата за извоз на жито преку Црното Море со цел обезбедување на поморската безбедност.
По средбата меѓу САД и Русија, извори за „Суспилне“ открија дека украинската делегација одлучила да остане во Саудиска Арабија уште еден дополнителен ден за да продолжи со дискусиите со американските претставници.
