Силна снежна бура низ Соединетите Американски Држави одзеде најмалку десет животи, остави милиони луѓе без електрична енергија и приземји илјадници летови.
Националната метеоролошка служба најавува дека снегот ќе продолжи да врне и денес. Околу дваесет федерални држави, вклучувајќи го и главниот град Вашингтон, веќе прогласија вонредна состојба, пренесува Франс Прес.
Мамдани: Пет мртви лица пронајдени надвор
Некои метеоролози ја сметаат сегашната бура за една од најсилните зимски бури во САД во последните децении. Заедно со снегот доаѓаат големи температурни минуси и замрзнување на инфраструктурата со потенцијално „катастрофални“ последици, предупредува националната метеоролошка агенција NWS.
Градоначалникот на Њујорк, Зохран Мамдани, објави дека пет лица биле пронајдени мртви надвор во текот на викендот. „Иако сè уште не ги знаеме причините за нивната смрт, ништо појасно не ја покажува опасноста од екстремен студ и ранливоста на многу наши сограѓани, особено на оние без домови“, рече тој на прес-конференција во неделата.
Властите во Тексас соопштија дека три лица починале од студ, вклучувајќи и тинејџерка која починала додека се санкала. Две лица, исто така, замрзнале до смрт во Луизијана, соопштија државните здравствени власти. Милиони луѓе во одреден момент останале без струја, а 840.000 сè уште биле без струја синоќа, особено во јужниот дел на САД, според PowerOutage.com.
Откажани се 19 илјади летови
Повеќе од 300.000 корисници се без струја во Тенеси, каде што бурата ги прекина далноводите. Луизијана, Мисисипи и Џорџија, држави каде што овој вид бура е поретко, имаа повеќе од 100.000 прекини.
Властите во Тексас, Северна Каролина и Њујорк ги повикаа граѓаните да останат дома. „Избегнувајте возење освен во апсолутна итна состојба“, соопштија службите за итни случаи на Тексас.
Бурата се движеше кон североисток синоќа, носејќи ги најобилните снежни врнежи кај жителите на Филаделфија, Њујорк и Бостон. Неколку сантиметри снег ги покрија тротоарите и патиштата во Вашингтон, каде што беше прогласена и вонредна состојба.
19.000 летови се откажани низ САД поради снежна бура, според порталот FlightAware.
